“Buta Airways” aşağı büdcəli aviaşirkəti sentyabrın 18-dən Ər-Riyada birbaşa reyslər həyata keçirəcək. Bu barədə aviaşirkətin məlumatında deyilir.

“Sentyabrın 18-dən etibarən “Buta Airways” Ər-Riyada reyslər həyata keçirəcək. Reyslər çərşənbə və şənbə günləri yerinə yetiriləcək”, - deyə məlumatda bildirilir.

Bundan başqa, oktyabrın 28-dən etibarən Səudiyyə Ərəbistanının daha bir böyük şəhəri – Dammama (bazar ertəsi və cümə günləri) reyslər həyata keçiriləcək.

Biletləri aviaşirkətin rəsmi internet saytında və satış ofislərində əldə etmək mümkündür.

“Yeni istiqamətlərin açılması İran Körfəzi ölkələrindən Azərbaycana əlavə turist axınına şərait yaradacaq və iki ölkə arasında işgüzar əlaqələri gücləndirəcək. Yaxın gələcəkdə "Buta Airways" aşağı büdcəli aviaşirkəti Yaxın Şərqin bir sıra digər şəhərlərinə birbaşa reyslər açmağı planlaşdırır”, - deyə məlumatda qeyd olunur.

“Buta Airways” Azərbaycanın ilk aşağı büdcəli aviaşirkətidir və "Azərbaycan Hava Yolları" QSC-nin (AZAL) struktur bölməsidir. Əsası 2016-ci ilin dekabrında qoyulub. İlk reys 2017-ci il sentyabrın 1-də yerinə yetirilib. Aviaşirkətinin donanması müasir “Embraer” təyyarələrindən ibarətdir. Aviaşirkət Bakıda, Heydər Əliyev Beynəlxalq Aeroportunda yerləşir.*

N.Abbasova