“Fitch Ratings” beynəlxalq reytinq agentliyi “Azərbaycan Beynəlxalq Bankı” (ABB) ASC-nin uzunmüddətli defolt reytinqini "B-" səviyyəsində təsdiq edib, proqnoz “Müsbət”dən “Stabil”ə dəyişdirilib. Bu barədə agentliyin məlumatında deyilir.

“Fitch”, həmçinin bankın maliyyə dayanıqlılığı (VR) reytinqini "b-", qısamüddətli defolt reytinqini isə "B" səviyyəsində təsdiq edib.

"ABB-nin reytinqləri üzrə əvvəlki proqnoz “Fitch”in bankın kredit profilinin yaxşılaşması gözləntiləri ilə şərtlənib, belə ki, bank açıq valyuta mövqeyini tədricən bağlamağa davam edib. Bununla belə, Azərbaycanda iqtisadi vəziyyət və manatın məzənnəsinə təzyiq yaxın perspektivdə ABB-nin maliyyə göstəricilərinə təsir göstərəcək. Bankın malik olduğu əhəmiyyətli kapital buferi “Stabil” proqnozuna kömək edir. "Fitch" hesab edir ki, ödəmə qabiliyyətinin reytinqin "CCC" səviyyəsinə qədər azaldılmasına haqq qazandıracaq dərəcədə zəifləyəcəyi ehtimal olunmur", - deyə məlumatda bildirilir.

Agentlik qeyd edir ki, bankın açıq valyuta mövqeyi 2019-cu ilin birinci rübünün sonuna olan 1 milyard dollardan 2020-ci ilin fevral ayının sonuna 0,8 milyard dollaradək azalıb.

Nisbətən zəif əməliyyat mühiti tərəfindən ABB-nin maliyyələşməsinə və likvidlik profilinə birbaşa təzyiq yoxdur.

"Maliyyələşmə mənbələri məhduddur və bu yaxınlarda restrukturizasiya zamanı buraxılmış və əsasən Azərbaycan Dövlət Neft Fonduna məxsus olan $1 milyard məbləğində avroistiqrazlardan ibarətdir. Xüsusilə devalvasiya riskinin güclənməsi halında depozitlərin azalması mümkün olsa da, biz bankın likvidlik ehtiyatlarının güclü mövqedə qalacağını gözləyirik. 2020-ci ilin fevral ayının sonuna likvid aktivlər müştərilərin ümumi maliyyələşdirilmə həcmini üstələyib", - deyə məlumatda qeyd olunur.

"Fitch"in ekspertlərinin fikrincə, əgər ABB bundan sonra da açıq valyuta mövqeyinin səviyyəsini azaltmağa davam edərsə, reytinqin daha da yaxşılaşacağını gözləmək olar.

ABB 1992-ci ildə yaradılıb və Azərbaycanın ən iri bankıdır. Bankın kapitalında Maliyyə Nazirliyinin payı 91,4% təşkil edir. Bütövlükdə, bankın kapitalında dövlətin payı 95,28% təşkil edir.*

Ə.Məmmədov