Britaniyanın “Anglo Asian Mining PLC” şirkəti (AAM – Azərbaycanda qızıl yataqlarının işlənməsi üzrə operator – İF-Az) BMT-yə və bir sıra xarici dövlətlərə müraciətlər göndərərək bu gün digər şirkətlər tərəfindən pozulan Azərbaycanın Qarabağ regionunda bir sıra faydalı qazıntı yataqlarının işlənməsi hüquqlarının bərpasında ona kömək göstərilməsini istəyib.
Xüsusilə, şirkət BMT, ABŞ Dövlət Departamenti, Birləşmiş Krallığın Xarici İşlər Nazirliyi və Avropa İttifaqına müraciətlər ünvanlayıb.
Şirkətin saytında qeyd olunur ki, “Anglo Asian Mining PLC” qeyd olunan dövlətlərdən və təşkilatlardan öz qanuni biznes hüquqlarının bərpası və əməkdaşlarının “Qızılbulaq” və “Dəmirli” mədənlərinə və Qarabağda ətraf ərazilərə təhlükəsiz fiziki çıxışın təmin edilməsinə dəstək göstərilməsini istəyib.
«Hazırda bu iki yataq Rusiya sülhməramlı kontingentinin məsuliyyət zonasındadır (Azərbaycanın Qarabağ iqtisadi rayonunda - İF) və burada Ermənistan və digər şirkətlər tərəfindən qızıl və digər faydalı qazıntıların qanunsuz hasilatı həyata keçirilir», - şirkətdən vurğulanır.
“Anglo Asian Mining PLC” qeyd edir ki, bu iki yataq Azərbaycan hakimiyyəti ilə saziş əsasında işlənilməsi məqsədilə şirkətə verilib.
Xəbər verildiyi kimi, dekabrın 12-dən etibarən Azərbaycanın ekofəalları və QHT nümayəndələri Qarabağ iqtisadi rayonunda Şuşa-Xankəndi avtomobil yolunda regionda faydalı qazıntı yataqlarının qanunsuz istismarına qarşı etiraz aksiyası keçirirlər.
Dekabrın 3-də və 7-də Rusiya sülhməramlı kontingentinin komandanlığı ilə aparılmış müzakirələrin nəticəsi olaraq dekabrın 10-dan Azərbaycan Respublikası İqtisadiyyat Nazirliyi, Ekologiya və Təbii Sərvətlər Nazirliyi, İqtisadiyyat Nazirliyi yanında Əmlak Məsələləri Dövlət Xidməti və “AzerGold” Qapalı Səhmdar Cəmiyyətinin mütəxəssislərindən ibarət heyət Rusiya sülhməramlı kontingentinin müvəqqəti yerləşdiyi Azərbaycan Respublikası ərazilərində faydalı qazıntı yataqlarının qanunsuz istismarı, bundan irəli gələn ekoloji və digər törəmə fəsadlarla bağlı ilkin monitorinqə başlamağı planlaşdırırdı.
Dekabrln 10-da İqtisadiyyat Nazirliyi və Ekologiya və Təbii Sərvətlər Nazirliyinin birgə məlumatında bildirilib ki, monitorinq zamanı faydalı qazıntı yataqlarına, xüsusilə Qızılbulaq qızıl və Dəmirli mis-molibden yataqlarına yerində baxış və müxtəlif istiqamətlər üzrə monitorinq, əmlakın kadastr uçotunun təşkili, ətraf mühitə, yeraltı və yerüstü su mənbələrinə potensial zərərin və risklərin qiymətləndirilməsi nəzərdə tutulurdu.
Lakin həmin gün İqtisadiyyat Nazirliyi təşkil edilmiş təxribatdan sonra monitorinqin baş tutmaması barədə məlumat verib. “Biz həmin yerdə bir qrup aqressiv gəncin yığıldığını gördük. Onlar bizim həmin obyektlərə, yataqlara girişimizə mane oldular. Hesab edirik ki, bu, əvvəlcədən təşkil olunmuş təxribat idi. Həmin təxribatın arxasında oraya gəlmiş Vitali Balasanyan və özünü qondarma rejimin nümayəndəsi kimi təqdim edən Ruben Vardanyan dayanırdılar”, - İqtisadiyyat Nazirliyinin nümayəndəsi Məsim Məmmədov jurnalistlərə açıqlamasında bildirib.
O əlavə edib ki, “əvvəlki müzakirələr nəticəsində səfərin təşkil edilməsi ilə bağlı verdikləri sözlərə baxmayaraq, Rusiya sülhməramlı qüvvələri tərəfindən normal fəaliyyət üçün şərait yaradılmamışdı”.
Bu vəziyyətlə əlaqədar Azərbaycan Respublikası Xarici İşlər Nazirliyi Rusiya tərəfinə müvafiq nota təqdim edib.Azərbaycan XİN-in spikeri Ayxan Hacızadə məlumat verib ki, Bakı notada əldə olunmuş razılığa uyğun olaraq, Azərbaycan nümayəndələrinin qeyd edilən yataqlara maneəsiz girişinin təmin edilməsinə bir daha çağırış edib.Belə səfərə maneçilik törədilməsinin və ya hər hansı bir şərt irəli sürülməsinin qəbuledilməz olduğunu vurğulayıb.
Azərbaycan XİN bəyanatla çıxış edərək qeyd edib ki, aksiya iştirakçılarının bütün tələbləri qanuna uyğundur. XİN bəyan edir ki, Laçın yolu Azərbaycan tərəfindən bağlanmayıb.
XİN-dən bildirilir ki, Azərbaycan vətəndaş cəmiyyətinin nümayəndələrinin və ekologiya fəallarının Şuşa-Laçın yolunda həyata keçirdiyi etiraz aksiyası Azərbaycan ictimaiyyətinin Rusiya sülhməramlılarının yerləşdiyi Azərbaycan ərazilərində həyata keçirilən qeyri-qanuni iqtisadi fəaliyyətə, təbii sərvətlərin talanmasına və ekologiyaya dəyən zərərə haqlı narazılığının nəticəsidir.
Dekabrın 16-dda Azərbaycan hökumətinin nümayəndələri ilə Rusiya sülhməramlıları arasında monitorinq qrupunun Qarabağ regionunda yataqlara yerində baxış keçirməsi predmeti ilə əlaqədar danışıqların növbəti raundu keçirilib. Lakin, RSK növbəti dəfə bu cür monitorinqin keçirilməsi üçün şərait yaratmayıb. **
R.Əhmədov
Ali Məclisin təkmilləşdirilmiş yeni rəsmi internet saytı istifadəyə verilib
Neftçala rayonunda abadlıq işlərinə 1,6 milyon manatdan artıq vəsait yönəldiləcək
Gədəbəy Rayon İH yolların əsaslı təmirinə 1 milyon manata yaxən vəsait yönəldəcək
İstanbul və Ankaranın hazırkı müxalifətçi merləri seçkilərdə öz şəhərlərində liderdir
İsrail hökuməti HƏMAS ilə danışıqlarda Qətərin vasitəçiliyindən məyus olub
Roma Papası Rusiya və Ukraynanı bütün hərbi əsirlərin mübadiləsinə çağırır
Yelo Bank 2024 ildə mənfəəti minimun 20% artırmaq planlaşdırır
İlkin Quliyev: “AccessBank” 2025-ci ilədək depozit portfelini 1,1 milyard manata çatdıracaq
Ağacanov: “Əliyev güclü liderdir, ona təzyiq göstərmək çətindir”
İyunda Bakıda “Caspian Oil&Gas” Neft-Qaz Sərgisi keçiriləcək
Oktyabrda Azərbaycanda “ICCA Venue Business Workshop International 2024” keçiriləcək
Unikal 2023-cü il: Qarabağ düyünü açıldı
Azərbaycanın neft-qaz sərvətləri dünyanın ən ekoloji cəhətdən təmiz və ucuz ehtiyatlarından biridir
İşğaldan azad olunmuş torpaqlarda işləmək şərəf, namus məsələsidir – usta ilə söhbət