Azərbaycan Milli Məclisi və Rusiya Dövlət Duması arasında əməkdaşlıq haqqında saziş imzalanıb.

“İnterfaks-Azərbaycan” agentliyinin verdiyi xəbərə görə, sazişi Milli Məclisin sədri Sahibə Qafarova və Dövlət Dumasının sədri Vyaçeslav Volodin bu gün Moskvada imzalayıblar.

Bu, iki qurum arasında imzalanan ilk belə sazişdir. Həmçinin yüksək səviyyəli parlamentlərarası komissiyanın yaradılmasına dair qərar qəbul edilib.

“Ölkələrimiz arasında əlaqələr dinamik inkişaf edir. Bu sürəti təmin edən, münasibətlərin inkişafı üçün güclü zəmin yaradan prezidentlərimizə minnətdarlığımı bildirməliyik”, - deyə Volodin vurğulayıb.

Onun sözlərinə görə, Rusiya və Azərbaycan parlamentləri ölkə prezidentləri səviyyəsində qəbul edilən qərarların qanunvericiliklə təminatı üzərində işləməlidir.

Volodin əlavə edib ki, sazişin imzalanması Dövlət Duması ilə Milli Məclis arasında qarşılıqlı fəaliyyətin yeni səviyyəsinə çıxmağa imkan verəcək əlamətdar hadisədir: “Bizim üçün bu, nəinki çox vacib, həm də münasibətlərin qurulması istiqamətində məsuliyyətli addımdır, çünki söhbət yeni formatların tətbiqindən, onların konkret məzmunla doldurulmasından gedir. Saziş isə bu problemi həll etməlidir”.

O, həmçinin müvafiq komitələr səviyyəsində qarşılıqlı fəaliyyətin daha fəal inkişaf etdirilməsinə çağırıb.

“Azərbaycan ilə Rusiya Federasiyası arasında münasibətlər ölkələrimiz arasında çoxəsrlik dostluq, mehriban qonşuluq, qarşılıqlı anlaşma və etimad əlaqələri əsasında inkişaf edir. Ən əsası odur ki, hər şey xalqlarımızın dostluğuna söykənir”, - deyə S.Qafarova vurğulayıb.

O, ticarət dövriyyəsinin, eləcə də Rusiya Federasiyasının Azərbaycan iqtisadiyyatına yatırdığı investisiyaların həcminin artdığını qeyd edib, həmçinin iki ölkə arasında mədəni-humanitar sahədə qarşılıqlı əlaqələrin xüsusi rolunu vurğulayıb.

Milli Məclisin sədri sazişin imzalanmasının iki ölkə arasında əlaqələrin hərtərəfli möhkəmlənməsinə töhfə verəcəyinə əminliyini ifadə edib.

Volodin onu da bildirib ki, bu il Dövlət Duması 2023-cü ildə yüz illiyi qeyd olunacaq Azərbaycanın ümummilli lideri Heydər Əliyevə həsr olunmuş sərgi keçirməyi planlaşdırır. O, sərginin may ayında keçirilə biləcəyini söyləyib.*

R.Əhmədov