Ermənistan tərəfinin təşəbbüsü ilə Rusiya prezidenti Vladimir Putinlə Ermənistan baş naziri Nikol Paşinyan arasında telefon danışığı baş tutub. Bu barədə Kremlin mətbuat xidməti məlumat yayıb.

Putin Qarabağda mövcud vəziyyətin müzakirəsi zamanı bütün məsələlərin konstruktiv şəkildə və Rusiya sülhməramlıları ilə sıx təmas və əməkdaşlıq şəraitində həllinin vacibliyini vurğulayıb.

“2020-2022-ci illərdə Rusiya, Ermənistan və Azərbaycan liderləri arasında əldə olunmuş razılaşmaların kompleks şəkildə həyata keçirilməsinin praktiki aspektləri, o cümlədən Ermənistan-Azərbaycan sərhədində sabitliyin və təhlükəsizliyin təmin edilməsi, regionda iqtisadi və nəqliyyat əlaqələrinin bərpası və sülh müqaviləsinin hazırlanması istiqamətində atılan addımlar müzakirə edilib”, - deyə məlumatda bildirilir.*