“Azerconnect” şirkəti işğaldan azad olunmuş Azərbaycan ərazilərində (Qarabağ və Şərqi Zəngəzur iqtisadi rayonlarda - İF) telekommunikasiya şəbəkəsinin inkişafına sərmayələrin həcmini 60 milyon manata çatdıracaq.

“Azərbaycanda İKT və yüksək texnologiyalar sahəsində innovasiyaların tətbiqi ilə seçilən “Azerconnect» şirkəti tərəfindənQarabağ bölgəsində telekommunikasiya şəbəkəsinin qurulmasına bu günə kimi 24 milyon manat həcmində sərmayə yatırılıb. “Azerconnect” şirkəti tərəfindən Azərbaycanın azad edilmiş ərazilərində telekommunikasiya infrastrukturunun bərpasına və inkişafına yatırılan sərmayənin həcmi 60 milyon manata çatacaq”, - “İnterfaks-Azərbaycan” şirkətin məlumatına istinadən xəbər verir.

“NEQSOL Holding»in tərkibinə daxil olan “Azerconnect” şirkəti həmçinin regionda daimi əsaslı yeni iş yerlərinin açılması istiqamətində də fəaliyyətini davam etdirir. Şirkət tərəfindən yaxın zamanda 100-ə yaxın şəxsin yeni iş yerləri ilə təmin edilməsi nəzərdə tutulub.

“Görülən bu işlər “NEQSOL Holding»in Azərbaycanın azad edilmiş ərazilərinə ümumilikdə 200 milyon manatadək sərmayə yatırmaq planlarının bir hissəsidir”, - məlumatda vurğulanır.

“Azerconnect” İKT və yüksək texnologiyalar sahələrində beynəlxalq standartlara uyğun müxtəlif xidmətlər təqdim edən şirkətdir. **

N.Abbasova