Azərbaycanın Baş naziri vəzifəsinə namizəd Əli Əsədov bəyan edib ki, qarşıdakı illərdə hökumət üçün əsas prioritetlər ordunun, təhlükəsizliyin, sərhədlərin möhkəmləndirilməsi, ölkə vətəndaşlarının rifahının artırılması olacaq.

Xəbər verildiyi kimi, Milli Məclis cümə günü keçirilən plenar iclasda Əli Əsədovun Azərbaycanın Baş naziri vəzifəsinə təyin olunmasına razılıq verib. İndi Azərbaycan prezidenti Əli Əsədovun Azərbaycanın Baş naziri vəzifəsinə təyin olunmasını təsdiq etməlidir.

“Növbəti dövrdə müdafiə və milli təhlükəsizliyin daha da gücləndirilməsi, hərbi sahədə texnoloji inkişaf və hərbi sənaye kompleksinin təkmilləşdirilməsi, Silahlı Qüvvələrin maddi-texniki təminatının yaxşılaşdırılması, sərhədlərimizin toxunulmazlığının təmin edilməsi əsas prioritetlər olacaq”, - Əsədov parlamentdə çıxışında bildirib.

Onun sözlərinə görə, Azərbaycan vətəndaşının rifahının yaxşılaşdırılması, o cümlədən sosial müdafiə sisteminin gücləndirilməsi hökumət qarşısında ən önəmli vəzifə kimi duracaq. **

X.Nəsirzadə