Qafqaz Müsəlmanları İdarəsinin (QMİ) sədri, Şeyxülislam Hacı Allahşükür Paşazadə orta məktəblərdə İslam dininin əsaslarının tədrisinin tərəfdarıdır.

“İstərdim ki, orta məktəblərdə din fənni tədris edilsin”, - deyə A.Paşazadə Oğuzda keçirilən “Dövlət-din münasibətləri və maarifləndirmə işi” mövzusunda seminar-treninqdə jurnalistlərə bildirib.

“Şagirdlər özünün mənəviyyatının haradan gəldiyini bilməlidir. Beləliklə, kənardan gələn radikal qüvvələr öz təsirini göstərə bilməyəcəklər”, - deyə o əlavə edib.

A.Paşazadə həmçinin bəyan edib ki, Azərbaycanda mədrəsələrin sayının artırılmasına ehtiyac duyulur. QMİ-nin sədrinin sözlərinə görə, bu gün din xalqın maraqlarına xidmət etməlidir, dini xadimlər bu istiqamətdə işlər aparmalıdırlar. “Dini xadim cəmiyyətin ayrılmaz hissəsidir və zamanın tələblərinə cavab verir”, - deyə o qeyd edib.