Azərbaycan Respublikasının Serbiya Respublikasında, Monteneqroda, Bosniya və Hersoqovinadakı səfiri Eldar Həsənov xeyli miqdarda büdcə vəsaitinin mənimsənilməsində şübhəli bilinərək tutulub. Bu barədə Dövlət Təhlükəsizliyi Xidmətindən (DTX) məlumat verilir.

DTX-nin “İnterfaks-Azərbaycan”a daxil olan məlumatında vurğulanır ki, həmçinin Həsənov digər qanun pozuntularının törədilməsində şübhəli bilinir.

Bildirilir ki, səfirin fəaliyyətində pozuntular Xarici İşlər Nazirliyinin fəaliyyət istiqamətləri üzrə ayrılan dövlət büdcə vəsaitlərinin mənimsənilməsi ilə bağlı həyata keçirilən istintaq-əməliyyat tədbirləri zamanı aşkar olunub.

DTX-dən qeyd olunur ki, hazırda cinayət işi üzrə istintaq-əməliyyat tədbirləri davam etdirilir.

DTX-nin məlumatına görə, Xarici İşlər Nazirliyinin bəzi vəzifəli şəxslərinin öz səlahiyyətlərindən sui-istifadə edib dövlətin qanunla qorunan mənafelərinə mühüm zərər vuran əməllərə yol vermələri ilə bağlı Dövlət Təhlükəsizliyi Xidmətində (DTX) başlanılmış cinayət işi üzrə Xarici İşlər Nazirliyinin İşlər idarəsinin müdiri, Nazirliyin Tender Komissiyasının sədri Fərhad Molla-zadə, Konsulluq idarəsinin rəisi Faiq Bağırov və digərləri vəzifə səlahiyyətlərindən sui-istifadə etmə, mənimsəmə, rüşvət alma faktlarına görə cinayət məsuliyyətinə cəlb edilərək barələrində məhkəmənin qərarları əsasında həbs qətimkan tədbiri seçilib. **

X.Nəsirzadə, A.Əzizov