Cənubi Koreya hökuməti “Azərsu” ASC-yə “Pirşağı Çirkab Sutəmizləyici Qurğusunun tikintisi layihəsi”nin reallaşdırılması üçün $43,5 mln. məbləğində kredit ayırmağı planlaşdırır. Bu barədə ASC-nin məlumatında bildirilir.

Çərşənbə axşamı “Azərsu” ASC-də keçirilən görüşdə Koreyanın İxrac-İdxal Bankının missiyası (The Export-Import Bank of Korea) sözügedən layihənin reallaşdırılması məsələsini müzakirə edib.

“Görüş zamanı qeyd edilib ki, Cənubi Koreya hökuməti Azərbaycana $43,5 mln. güzəştli kredit ayırmaq niyyətindədir. Kredit ilk 10 ili güzəştli olmaqla, 40 il müddətinə və illik 0,2% dərəcəsi ilə ayrılacaq”, - deyə məlumatda qeyd edilir.

Layihə çərçivəsində Pirşağı qəsəbəsində məhsuldarlığı sutkada 40 min kubmetr olan çirkab sutəmizləyici qurğunun inşası planlaşdırılır. Ən son texnologiya əsasında inşa olunacaq çirkab sutəmizləyici qurğuda təmizlənmiş sudan suvarma məqsədləri üçün istifadə olunacaq.

Həmçinin, layihə çərçivəsində Pirşağı qəsəbəsinin abadlaşdırılması da nəzərdə tutulur.

Ümumi dəyəri $60 mln. olan layihənin qalan hissəsini Azərbaycan hökuməti maliyyələşdirəcək.