Nizami Gəncəvi adına Milli Azərbaycan Ədəbiyyatı muzeyində görkəmli Azərbaycan şairəsi Xurşudbanu Natavana həsr olunmuş elmi praktik konfrans keçirilib.

Azərbaycan Milli Elmlər Akademiyasının müxbir üzvü, muzeyin direktoru Rafael Hüseynov tədbirdə şairənin həyat və yaradıcılığı barədə məruzə ilə çıxış edərək onun tanınmış ədəbi xadim Aleksandr Düma və başqaları ilə əlaqələrini xüsusilə vurğulayıb.

Həmçinin, “Xurşudbanu Natavanın bədii irsində Füzuli ənənələri mənəvi işıq kimi”, “ Qarabağın ictimai həyatında Natavanın yeri” mövzularında məruzələr dinlənilib.

Nizami muzeyinin konfrans zalında şairənin muzeyin fondunda qorunan şəxsi əşyaları, rəssamlar tərəfindən müxtəlif illərdə çəkilmiş portretləri nümayiş etdirilib. Məruzələr dinlənildikdən sonra konfrans iştirakçıları diskussiya aparıb, şairənin həyat və yaradıcılığana aid muzey ekspozisiyalarına tamaşa ediblər.