SOCAR şirkəti (Azərbaycan Respublikası Dövlət Neft Şirkəti, ARDNŞ) “Bulla-dəniz” yatağındakı 90 saylı quyunun ətrafında ətraf mühitin monitorinqini həyata keçirib. Bu barədə şirkətin saytında dərc edilmiş məlumatda qeyd olunur.

Monitorinqdə vizual müşahidələr zamanı dəniz səthində neft və kondensat ləkələri müşahidə edilməyib.

SOCAR-ın mütəxəssisləri üç stansiyadan dəniz dibindən dib çöküntüləri, bentos nümunələri, dəniz suyunda fitoplankton və zooplankton nümunələri götürüblər. Hazırda Kompleks Tədqiqatlar Laboratoriyasında götürülmüş nümunələr üzrə təhlil aparılır.

Tədbirlər planına əsasən, quyu ətrafında ətraf mühitin monitorinqi davam etdiriləcək.

Xəbər verildiyi kimi, avqustun 17-də axşam “Bulla-dəniz” yatağının şimal-şərq qanadında 29 saylı dəniz özülündəki 90 saylı quyuda yanğın baş verib. Gecə saat 23.00-da 5868 metr dərinlikdə qazma zamanı quyuda qaz təzahürləri müşahidə olunub. Kəsilişə görə bu dərinlik məhsuldar qatın VIII horizontunun ortasına uygun gəlir. Qaz təzahürünün qarşısını almaq üçün qazma briqadası tərəfindən mümkün olan bütün tədbirlər görülüb. Buna baxmayaraq gecə 23:30-da quyu açıq qaz fontanına keçib və yanğın baş verib. Görülən təcili tədbirlər nəticəsində platformada olan işçilər evakuasiya olunaraq sahilə çıxarılıblar. Hal-hazırda özülün ətrafında yanğınsöndürən gəmilər yanğına nəzarət edir.

Quyuda qazma işlərinə 2012-ci ilin noyabr ayında başlanılıb.

90 saylı quyuda baş vermiş qəzanın aradan qaldırılması üçün SOCAR prezidentinin əmri ilə komissiya yaradılıb. Komissiyanin tərkibinə şirkətin və Fövqəladə Hallar Nazirliyinin fontana qarşı mübarizə və yanğından mühafizə üzrə təcrübəli mütəxəssisləri daxil edilib.

Artıq qəzanın aradan qaldırılması üzrə ilkin proqram hazırlanıb, fontanın təcrid edilməsi üçün görüləcək işlər müzakirə olunub, müvafiq strukturlara konkret tapşırıqlar verilib. Həmin tapşırıqlar əsasında quyuda təcridetmə üzrə hazırlıq işlərinə başlanılıb.