Azərbaycan Dövlət Neft Fondunun (ARDNF) Müşahidə Şurası bazar ertəsi keçirilən iclasda fondun 2014-cü il büdcəsinin icrası layihəsinə baxıb. Bu barədə ARDNF-in məlumatında deyilir.

Müşahidə Şurası iclasda ARDNF-in maliyyə fəaliyyəti haqqında illik hesabatı, maliyyə fəaliyyətinin auditinin nəticələri, fondun 2014-cü il büdcəsinin icrası məsələlərinə baxıb.

“Şura fondun 2014-cü ildəki fəaliyyəti haqqında illik hesabatına və maliyyə fəaliyyəti haqqında müstəqil auditorun (“PriceWaterhouseCoopers”) hesabatına baxaraq onları məqbul hesab edib və Neft Fondunun 2014-cü il büdcəsinin icrası layihəsinin təsdiq olunmaq üçün Azərbaycan prezidentinə təqdim olunması barədə qərar qəbul edib”, - deyə məlumatda bildirilir.

İclasda Azərbaycanın baş naziri, Dövlət Neft Fondunun Müşahidə Şurasının sədri Artur Rasizadə növbəti müddətə ARNDF-in Müşahidə Şurasının sədri seçilib.

Xəbər verildiyi kimi, 2014-cü ildə fondun gəlirləri 12 mlrd. 731 mln. manat, xərcləri 10 mlrd. 117,2 mln. manat təşkil edib.

1999-cu ildə yaradılan Neft Fondunda neft müqavilələrinin reallaşmasından, əsasən dövlətin mənfəət neftinin satışından, ölkə ərazisində neft və qazın nəqlinə görə tranzit tariflərindən, dövlət əmlakının icarəsindən və digər mənbələrdən daxil olan gəlirlər toplanır.

A.Əzizov