2018-ci ildə Azərbaycanda yol hərəkəti qaydaları pozuntusuna görə 85,6 mln. manat cərimə tətbiq edilib. Bu barədə “İnterfaks-Azərbaycan” agentliyinə Dövlət Statistika Komitəsindən məlumat verilib.

«2018-ci ildə 85,6 mln. manat cərimə tətbiq edilib (2017-ci ildə 73,7 mln. manat, yəni 16,1% çox - İF)). Hesabat dövründə yol hərəkəti qaydaları əleyhinə 3 mln. 409,7 min inzibati xəta (2017-ci illə müqayisədə artım 1,3%) aşkarlanıb», - DSK-dan qeyd olunur.

«Xətaların 49,6%-i yolda müəyyən edilmiş hərəkət sürəti həddinin aşılması, 14,1%-i yol nişanlarının və ya yolların hərəkət hissəsinin işarələrinin tələblərinə riayət edilməməsi, 10,9%-i dayanma və ya durma qaydalarının pozulması, 9,1%-i svetoforun və ya nizamlayıcının qadağanedici işarəsi verilərkən hərəkətin davam etdirilməsi, 3,1%-i təhlükəsizlik kəmərini bağlamadan nəqliyyat vasitəsinin idarə olunması, qalan hissəsi isə digər səbəblər üzrə aşkarlanıb», - deyə məlumatda bildirilir.

2018-ci ildə yol-nəqliyyat hadisələrinin sayı 0,9% - 1,817 minədək, zərərçəkənlərin sayı isə 1,5% - 2,433 min nəfərədək azalıb.

“Yol qəzalarında 1,711 min nəfər müxtəlif dərəcəli bədən xəsarəti alıb, 722 nəfər isə ölüb. Yol-nəqliyyat hadisələri nəticəsində həlak olanların 76,5%-ni, yaralananların isə 74,1%-ni kişilər təşkil edib”, - Komitədən qeyd olunub.

Yol-nəqliyyat hadisələrinin 90%-i yaşayış məntəqələrində baş verib, bu hadisələr nəticəsində həlak olanların sayı ötən ilin müvafiq dövrünə nisbətən 7,3% artaraq 556 nəfər, yaralananların sayı isə 0,9% artaraq 1,628 min nəfər olub.

Bütün yol-nəqliyyat hadisələrinin 47,5%-i nəqliyyat vasitələrinin və piyadaların iştirakı ilə baş verib.

Nəqliyyat vasitələrinin sərxoş vəziyyətdə idarə olunması səbəbindən ölümlə və ya bədən xəsarəti alınması ilə nəticələnən 49 hadisə baş verib, nəticədə 27 nəfər ölüb, 36 nəfər yaralanıb.

Bundan başqa, hadisələrin 40,9%-i gündüz, 38,7%-i gecə baş verib, 29,1%-i həftənin şənbə və bazar günlərinə təsadüf edib.**

R.Babayev