2020-ci ilin birinci rübündə ASK məhsullarının istehsalının artımı 3,7% təşkil edib. Bunu prezident İlham Əliyev deyib.

“Bitkiçilikdə daha böyük nəticələr əldə edilib, 13%-dən çox artım var. Nəzərə alsaq ki, keçən il də bitkiçilikdə artım böyük idi, bu, göstərir ki, bu sahə uğurla, sürətlə inkişaf edir. Heyvandarlığa gəldikdə, burada inkişafa nail olmaq üçün daha çox vaxt lazımdır. Burada da artım 3%-dən bir qədər çoxdur. Birinci rübdə kənd təsərrüfatının artımı 3,7% olub”, - Əliyev çərşənbə axşamı 2020-ci ilin birinci rübünün sosial-iqtisadi yekunlarına həsr olunan videokonfrans şəklində müşavirədə bildirib.

Bundan başqa, dövlət başçısı qeyd edib ki, bu il kənd təsərrüfatı sahəsində çalışan sahibkarlara Sahibkarlığın İnkişafı Fondundan kreditlərin ayrılması nəzərdə tutulur.

“Xüsusilə hesab edirəm ki, indiki şəraitdə kənd təsərrüfatı emalı sahəsinə daha çox diqqət yetirilməlidir. Çünki biz əlavə dəyər zənciri yaratmalıyıq və çalışmalıyıq ki, həm daxili bazara, həm xarici bazarlara daha çox hazır məhsul təqdim edək. Eyni zamanda, bu, yeni iş yerlərinin yaradılmasına da gətirib çıxaracaq. Əlbəttə ki, kiçik sahibkarlar da yaddan çıxmamalıdır”, - dövlət başçısı vurğulayıb.

Əliyev qeyd edib ki, Azərbaycanda kənd təsərrüfatının istehsalı yüksək templərlə inkişaf etməlidir ki, ölkə həm daxili tələbatı ödəyə bilsin, eyni zamanda, ixrac bazarlarına da öz məhsulunu çatdıra bilsin.

“Qeyd etdiyiniz məsələlərin həlli üçün, əlavə vəsait ayrılmalıdır. Mikrokreditlərin verilməsi üçün Prezidentin ehtiyat fondundan 30 milyon manat vəsait ayrılacaq”, - Əliyev deyib.

Dövlət başçısı qeyd edib ki, quraqlıqla bağlı məsələ çox ciddidir və təxirsiz tədbirlər tələb edir. Bununla əlaqədar xüsusi komissiya yaradılmalıdır. Onun sözlərinə görə, komissiyaya baş nazirin müavini Şahin Mustafayev rəhbərlik edəcək.

“Şahin Mustafayev İqtisadiyyat naziri işlədiyi dövrdə bu məsələ ilə fəal məşğul olub və mənə müntəzəm olaraq məruzələr edib. Komissiyada aidiyyəti qurumların rəhbərləri - kənd təsərüfatı naziri, iqtisadiyyat naziri, ekologiya və təbiisərvətlər naziri, "Meliorasiya və Su Təsərrüfatı" Səhmdar Cəmiyyətinin, "Azərsu" Səhmdar Cəmiyyətinin rəhbərləri və digər aidiyyəti qurumların rəhbərləri təmsil olunmalıdırlar ki, konkret tədbirlər planı hazırlansın”, - Əliyev bəyan edib.

Kənd təsərüfatı naziri İnam Kərimov öz növbəsində qeyd edib ki, hazırkı dövr kənd təsərrüfatı sahəsində aqrotexniki tədbirlərin və yazlıq səpinlərin ən intensiv dövrünə təsadüf edir. Bölgələrdə hazırda mineral gübrə, pestisid, toxum təchizatı və satışı həyata keçirilir, kənd təsərrüfatı texnikalarının məhdudiyyətsiz hərəkəti təmin edilib.

“1 milyon hektardan çox sahədə taxıl əkini aparılıb. Əkin sahələrinin 641 min hektarını buğda, 369 min hektarını arpa əkinləri təşkil edir. Hazırda əkin sahələrində intensiv aqrotexniki tədbirlər aparılır, vegetasiya suvarmaları həyata keçirilir. Bu il respublikanın 21 rayonu üzrə 100 min hektar sahədə pambıq əkini proqnozlaşdırılır. Yaxın günlərdə əkin sahələrində intensiv səpinə başlanılacaq. Artıq 19 mindən çox istehsalçı ilə müqavilələr bağlanılıb, əkin sahələrinin toxum, gübrə, pestisidlə təminatı ilə bağlı tədbirlər görülüb. Digər yazlıq əkinlər - tütün, şəkər çuğunduru, bostan-tərəvəz, kartof əkini üzrə tədbirlər həyata keçirilir. Bu günədək elektron sistemdə 484 mindən artıq fermer qeydiyyatdan keçib, 357 mindən çox fermer payızlıq əkinlərini bəyan edib. Artıq bu günə 321 mindən artıq fermerə subsidiyalar ödənilib», - nazir qeyd edib.

O vurğulayıb ki, biçinə 728 kombayn cəlb ediləcək. Bundan əlavə, əlavə 125 kombaynın alınması planlaşdırılır.

Bundan başqa, Kərimov bildriib ki, bir neçə gün əvvəl prezidentin imzaladığı fərmana əsasən, fermerlərə girovsuz aqrar kreditin verilməsi mexanizmi formalaşdırılıb.

“Fermerlərimizin qarşılaşdığı digər çətinliklərdən biri də əkin mövsümü dövründə kiçikhəcmli kredit mənbələrinə çıxışın məhdud olması idi. Çünki banklar əksər hallarda güzəştli kredit ayırmaq üçün fermerlərdən Bakıda mənzil girovu tələb edirdilər”, - nazir qeyd edib. **

X.Nəsirzadə