Səudiyyə Ərəbistanı Krallığında Bakı ilə Ər-Riyad arasında iqtisadi əməkdaşlığın möhkəmlənməsi üçün böyük imkanlar görürlər. Bu barədə Səudiyyə Ərəbistanı Krallığının xarici işlər naziri Feysal bin Fərhan Al Səud bəyan edib.

“Siyasi səviyyədə və xalqlarımız arasında güclü əlaqələrə baxmayaraq, iqtisadiyyat sahəsində görüləcək işlər çoxdur. Ticarət dövriyyəmiz aşağıdır və qarşılıqlı sərmayə qoyuluşu da hər iki ölkənin iqtisadi potensialına uyğun deyil. Son iki ildə Azərbaycanda ciddi iqtisadi artım olub və ölkəniz Səudiyyə Ərəbistanı Krallığı kimi böyük uğurlara imza atıb. Biz Səudiyyə Ərəbistanında inanırıq ki, mövcud olan qardaşlıq münasibətlərimizin təməli üzərində daha güclü əməkdaşlığın qurulması üçün böyük imkanlar var”, - Feysal bin Fərhan Al Səud çərşənbə axşamı Azərbaycan prezidenti İlham Əliyevlə görüş zamanı bildirib.

“İnterfaks-Azərbaycan” agentliyi dövlət başçısının saytına istinadən məlumat verir ki, Səudiyyə Ərəbistanı Krallığının xarici işlər naziri ikitərəfli əməkdaşlığın genişlənməsi üçün böyük potensialın olduğunu qeyd edib.

Öz növbəsində, Əliyev XİN başçısının səfərinin artıq mümkün olan ən yüksək səviyyəyə çatmış münasibətlərin daha da inkişafında çox vacib rol oynayacaq. O vurğulayıb ki, Bakı Ər-Riyad ilə mövcud olan səmimi münasibətlərə böyük dəyər verir.“Biz hər zaman hökumətinizin və xalqınızın dəstəyini hiss etmişik. İşğal dövründə Səudiyyə Ərəbistanı az sayda olan ölkələrdən biri idi ki, bizim haqlı işimizə davamlı dəstək verirdi. Bunun bariz nümunəsi işğal dövründə Səudiyyə Ərəbistanının Ermənistanla diplomatik münasibətlər qurmaması idi. Bu addımı isə dünyada yalnız üç ölkə atıb və biz buna görə həqiqətən də minnətdarıq”, - prezident vurğulayıb.

Həmçinin, dövlət başçısı ölkədə COVİD-19-la bağlı vəziyyətin stabilləşməsi səbəbindən Azərbaycana turist axının artacağına əminlik ifadə edib. Eyni zamanda, Əliyev bildirib ki, Səudiyyə Ərəbistanından Azərbaycana səfər edən turistlərin sayı artıq pandemiyadan öncəki səviyyəyə qayıdıb. **

R.Kərimov