Azərbaycan İrana 2023-cü ilin əvvəlində iqtisadi, ticarət və humanitar sahələrdə əməkdaşlıq üzrə Dövlət Komissiyasının növbəti iclasını keçirməyi təklif edib.

“İnterfaks-Azərbaycan” İran XİN-ə istinadən məlumat verir ki, Azərbaycanın xarici işlər naziri Ceyhun Bayramov dünən İran İslam Respublikasının xarici işlər naziri Hüseyn Əmir Abdullahian ilə telefon danışığı əsnasında bu təkliflə çıxış edib.

“Azərbaycanın xarici işlər naziri söhbət zamanı İran İslam Respublikası ilə əməkdaşlığın vacibliyini vurğulayıb. O cümlədən, Bayramov bəyan edib ki, Bakı 2023-cü ilin əvvəlində iki ölkənin iqtisadi, ticarət və humanitar sahələrdə əməkdaşlıq üzrə Dövlət Komissiyasının növbəti iclasının keçirilməsi və ticarət-iqtisasi əlaqələrin aktivləşməsində maraqlıdır”, - İran XİN qeyd edir.

Öz növbəsində, İranın xarici işlər naziri 2023-cü ildə Tehran ilə Bakı arasında münasibətlərin siyasi və iqtisadi sahələrdə genişlənəcəyinə ümidvar olduğunu bildirib.

O, həmçinin İranın Azərbaycanla nəqliyyat və tranzit əlaqələrini aktivləşdirməyə hazır olduğunu xatırladıb və bəyan edib ki, bu sahələrdə əməkdaşlıq genişləndirilməlidir.

Abdullahian bir daha vurğulayıb ki, İran regionda xarici dövlətlərin olması ilə razı deyil.

“Telefon danışığı zamanı İranın xarici işlər naziri tərəfindən qaldırılan və təklif edilən digər məsələlər arasında hər iki tərəfdən KİV-in fəaliyyətinin müzakirəsi məqsədilə işçi qruplarının formalaşdırılması, su çatışmazılığı və Araz çayının çirkləndirilməsinin öyrənilməsi olub”, - XİN vurğulayır. **

R.Əhmədov