Avropa İttifaqında (Aİ) Ermənistan və Azərbaycanı təmkinli olmağa, Cənubi Qafqazda sabitliyin pozulmasına yönələn fəaliyyətin qarşısını almağa çağırıblar.

“Biz bütün maraqlı tərəfləri, regional sabitliyi daha da pozacaq və sülh prosesini təhlükə altına qoyacaq istənilən gələcək fəaliyyətin qarşısnı almaq məqsədilə təmkinli olmağa çağırırıq”, - bazar ertəsi Aİ-nin xarici siyasi xidmətindən vəyan ediblər.

Qeyd olunub ki, Aİ dünən baş vermiş insidentdən təəssüf hissi duyur və vurğulanıb ki, təfərrüatlar “ətraflı araşdırılmalıdır”.

Bazar günü Azərbaycan Müdafiə Nazirliyi Ermənistanın Qarabağ iqtisadi rayonunda hərbi təxribat törətməsi ilə bağlı məlumat yayıb.

“Xankəndi-Xəlfəli-Turşsu torpaq yolundan istifadə edilməklə Ermənistan Respublikasından hərbi ləvazimatların, silah-sursatın və şəxsi heyətin Rusiya sülhməramlı kontingentinin müvəqqəti yerləşdiyi Azərbaycan ərazilərinə daşınmasının həyata keçirilməsi barədə operativ məlumatlar daxil olub. Martın 5-də səhər saatlarında daxil olmuş məlumatın yoxlanması məqsədilə qanunsuz hərbi daşınmalar həyata keçirən nəqliyyat vasitələrinin Azərbaycan Ordusunun bölmələri tərəfindən saxlanılaraq yoxlanılmasına cəhd göstərilib”, - məlumatda bildirilir.

Qarşı tərəfdən atəş açılıb və baş vermiş atışma nəticəsində hər iki tərəfdən həlak olan və yaralananlar var.

Daha sonra Müdafiə Nazirliyinin verdiyi məlumata əsasən, təxribat nəticəsində Azərbaycan Ordusunun hərbi qulluqçuları Şəhriyar Əlibəyli və Eşqin Hüseynov şəhid olublar. **

R.Kərimov