Xarici işlər naziri Ceyhun Bayramov Ermənistanla sülh müqaviləsinin imzalanmasını qaçılmaz hesab edir.

“Mayda intensiv danışıqlar (sülh müqaviləsi ilə bağlı – İF) aparılıb. Əvvəlcə Vaşinqtonda (Azərbaycan və Ermənistan XİN başçıları səviyyəsində - İF), sonra isə Moskvada. Bundan başqa, iki ölkənin liderləri bir neçə dəfə görüşüb. Yaxın vaxtlarda Vaşinqtonda danışıqların daha bir raundu (XİN başçıları səviyyəsində - İF) keçiriləcək”, - deyə Bayramov bu gün jurnalistlərə bildirib.

Onun sözlərinə görə, Azərbaycan Ermənistanla beynəlxalq hüquqa uyğun 5 baza prinsipi əsasında sülh müqaviləsinin imzalanması təşəbbüsü ilə çıxış edib. “Sülhün əldə olunması qaçılmazdır, münasibətlərin normallaşdırılması haqqında saziş imzalanmalıdır”, - deyə XİN başçısı qeyd edib.

Bayramov deyib ki, tərəflər arasında sülh müqaviləsi ilə bağlı razılaşdırılmamış məqamlar qaldığı üçün danışıqlar davam etdiriləcək.

O, həmçinin hesab edir ki, bütövlükdə, regionda mühüm proseslər gedir.

Daha əvvəl Ermənistanın baş naziri Nikol Paşinyan iyunun 12-də Vaşinqtonda Bakı ilə İrəvan arasında sülh müqaviləsi üzrə danışıqların növbəti raundunun başlayacağını bildirmişdi.*

R.Əhmədov