İqtisadiyyat naziri Mikayıl Cabbarov avqustun 9-da Dünya Bankının (DB) Azərbaycan üzrə ölkə meneceri Ştefani Ştalmeysterlə görüşüb.

“Görüşdə tərəflər çoxşaxəli əməkdaşlığı qeyd ediblər. Bankla özəl sektorun diaqnostikası, innovasiyalar, rəqəmsal inkişaf, idarəetmə texnologiyalarının inkişafı, bərpa olunan enerji və digər sahələrdə əməkdaşlığın Azərbaycanda qabaqcıl beynəlxalq təcrübənin tətbiqi, müasir texnologiya və yeniliklərin ölkəmizə gətirilməsi baxımından xüsusi önəm kəsb etdiyi diqqətə çatdırılıb”, - deyə İqtisadiyyat Nazirliyindən bildirilib.

Ş.Ştalmeyster ölkəmizin strateji inkişaf məqsədlərinə nail olunması istiqamətində bankın Azərbaycan hökuməti ilə sıx əməkdaşlığı davam etdirəcəyinə əminliyini bildirib, tərəfdaşlığın yeni istiqamətləri barədə fikirlərini bölüşüb.

Tərəflər, həmçinin Dünya Bankı ilə ölkəmiz arasında əməkdaşlığın gücləndirilməsi, birgə layihələr, həmçinin Azərbaycan iqtisadiyyatının şaxələndirilməsi və biznes mühitinin davamlı olaraq yaxşılaşdırılması istiqamətində həyata keçirilən tədbirlər, investisiyaların təşviqi barədə müzakirə aparıblar.

Azərbaycan 1992-ci ildən DB-nin üzvüdür. Əməkdaşlıq dövründə bankın ümumilikdə $3,2 milyard məbləğində kredit vəsaiti hesabına Azərbaycanda 49 layihə həyata keçirilib. Hazırda 3 layihə aktivdir.*

X.Nəsirzadə