2023-cü ilin aprel-sentyabr aylarında Bakı-Tbilisi-Ceyhan boru kəməri (BTC) ilə 609 min ton Qazaxıstan nefti nəql olunub, ilin sonunadək bu həcm 1.1 milyon tona çatdırılacaq. Bunu energetika naziri Pərviz Şahbazov deyib.

“BTC sisteminə bu ilin aprel-sentyabr aylarında təxminən 609 min ton Qazaxıstan nefti nəql olunub. Bunun 493 min tonu Ceyhan limanından dünya bazarına göndərilib. İlin sonunadək bu həcm 1.1 milyon tona çatdırılacaq”, - deyə nazir oktyabrın 4-də “Qazaxıstan Enerji Həftəsi-2023/XV Avrasiya Forumu KAZENERGY” tədbiri çərçivəsində keçirilən Şanxay Əməkdaşlıq Təşkilatının (ŞƏT) 1-ci Enerji Forumunda onlayn formatda çıxışı zamanı bildirib.

Xəbər verildiyi kimi, Qazaxıstan neftin ixrac marşrutlarını şaxələndirmək məqsədilə neftin BTC ilə ixracına başlayıb. Daha əvvəl SOCAR və “KazMunayQaz” arasında ildə 1,5 milyon ton Qazaxıstan neftinin BTC ilə nəqli haqqında müqavilə bağlanıb. Neft ixracına 2023-cü ilin aprel ayında başlanılıb.

BTC neft kəmərinin uzunluğu 1768 km-dir. Bunun 443 km-i Azərbaycan, 249 km-i Gürcüstan, 1076 km-i Türkiyə ərazisindədir. Boru kəmərinin illik ötürmə qabiliyyəti 50 milyon tondan çoxdur.

Layihənin iştirakçıları BP (30,1%); SOCAR (25%); MOL (8,9%); “Equinor” (8,71%); TPAO (6,53%); ENI (5%); “Itochu” (3,4%); “ExxonMobil” (2,5%); INPEX (2,5%), “TotalEnergies” (5%) və “ONGCVidesh” (2,36%) şirkətləridir.

Hazırda “Azəri-Çıraq-Günəşli” yataqlar blokundan hasil olunan neft və “Şahdəniz” yatağından çıxarılan kondensat, SOCAR-ın neft və kondensatı, eləcə də digər mənbələrdən neft BTC boru kəməri ilə nəql olunur.

2022-ci ildə BTC ilə 225,445 milyon barel neft (2021-ci ilin göstəricisi ilə müqayisədə +12,6%) ixrac edilib.*

N.Abbasova