Bağdad Bakı ilə əməkdaşlıq sahələrinin genişlənməsində maraqlıdır. Bu barədə İraq prezidenti Əbdüllətif Camal Rəşid bəyan edib.

“Əməkdaşlığımız keçmişdəkindən daha da güclü olmaq üzrədir. Biz bir çox fəaliyyət sahələrində - infrastrukturun inşası, ticarət, neft və qaz, transmilli layihələr, eyni zamanda, İraqa investisiyalar, eləcə də turizm və təhsilin, həmçinin iki ölkə üçün çox əhəmiyyət kəsb edən sahələrin təşviqi ilə bağlı əməkdaşlıq edə bilərik”, - Rəşid bazar ertəsi Azərbaycan prezidenti İlham Əliyev ilə mətbuata bəyanatlarla çıxışında bildirib.

O, həmçinin İraq tərəfinin yaxın vaxtlarda İraqda keçiriləcək hökumətlərarası komissiyanın iclasının gündəliyindəki bütün maraqlı olan məsələləri müzakirə etməyə hazır olduğunu qeyd edib.

“Çox şadam ki, Azərbaycan nümayəndə heyəti tezliklə İraqa səfər edəcək. Sizin də qeyd etdiyiniz kimi, cənab Prezident, biz yenə də əməkdaşlıq üçün və bir çox sahələrdə əməkdaşlığın başlanılması üçün zəruri olan bütün məsələləri müzakirə edəcəyik. Hesab edirəm ki, İraqda biznes üçün və Azərbaycan üçün İraqda biznes imkanları ilə bağlı yeni bir mühit yaratmalıyıq”, - İraq lideri vurğulayıb. **

X.Nəsirzadə