2024-cü ildə Hasilatın Pay Bölgüsü haqqında sazişlər (PSA, HPBS) çərçivəsində Azərbaycanın payına düşən neft və qazın satışından Azərbaycan Dövlət Neft Fonduna (ARDNF) daxilolmalar $4 milyard 791,9 milyon məbləğində proqnozlaşdırılır. “İnterfaks-Azərbaycan” agentliyi xəbər verir ki, bu barədə ARDNF-in 2024-cü il büdcəsinin layihəsinə dair Hesablama Palatasının rəyində deyilir.

“2024-cü ildə PSA çərçivəsində Azərbaycanın payına düşən neft və qazın satışından ARDNF-ə daxilolmalar $4 milyard 791,9 milyon məbləğində (8 milyard 146,2 milyon manat) proqnozlaşdırılır ki, bu da 2023-cü ilin proqnoz göstəricisindən 3 milyard 619,6 milyon manat və ya 30,8%, 2023-cü il üçün gözlənilən icra göstəricisindən isə 6 milyard 136,1 milyon manat və ya 43% azdır”, - deyə rəydə bildirilir.

Bu azalma onunla əlaqədardır ki, 2024-cü ildə mənfəət nefti və qazının satışından ARDNF-in gəlirləri bir barel neftin orta qiyməti $60 olmaqla hesablanıb, 2023-cü ilin 9 ayının yekunları üzrə bir barel neftin (“Azeri Light” – İF) faktiki orta qiyməti isə $85,5 təşkil edib.

2024-cü ildə “Azəri-Çıraq-Günəşli” bloku (AÇG) üzrə mənfəət neftinin satışından ARDNF-ə daxilolmalar $4 milyard 89,46 milyon (70,86 milyon barel neft), “Şahdəniz” yatağı üzrə mənfəət kondensatı və qazının satışından $596,31 milyon (6,48 milyon barel kondensat və 5,02 milyard kubmetr qaz), “Abşeron” yatağı üzrə $77,38 milyon məbləğində (0,81 milyon barel kondensat və 0,29 milyard kubmetr qaz) proqnozlaşdırır.

2024-cü ildə Suraxanı və Qaraçuxur yataqları üzrə karbohidrogen satışından ARDNF-in gəlirləri $2,18 milyon, Zığ-Hövsan yatağı üzrə $1,72 milyon, Kürsəngi və Qarabağlı yataqları üzrə $1,71 milyon, Neftçala və Xıllı yataqları üzrə $0,47 milyon, Mişovdağ və Kəlaməddin yataqları üzrə $1,33 milyon, Kürovdağ yatağı üzrə $6,19 milyon, Balaxanı-Sabunçu-Ramana və Kürdəxanı yataqları üzrə $7,1 milyon, Binəqədi blokuna daxil olan yataqlar üzrə $6,68 milyon, Qum-Dəniz və Bahar yataqları üzrə $1,36 milyon məbləğində proqnozlaşdırılır.

ARDNF-də neft müqavilələrinin reallaşmasından, əsasən dövlətin mənfəət neftinin satışından, ölkə ərazisində neft və qaz nəqlinə görə tranzit tariflərindən, dövlət əmlakının icarəsindən və digər mənbələrdən daxil olan gəlirlər toplanır.*

N.Abbasova