2020-ci ilin I rübündə Azərbaycanın tədiyə balansının cari əməliyyatlar hesabının profisiti $643,6 milyon təşkil edib. Bu barədə “İnterfaks-Azərbaycan” agentliyinə Mərkəzi Bankdan məlumat verilib.

Xəbər verildiyi kimi, 2019-cu yanvar-mart aylarında Azərbaycanın tədiyə balansının cari əməliyyatlar hesabının profisiti $1 milyard 602,7 milyon təşkil edib. Beləliklə, cari ilin I rübündə profisit 2,5 dəfə azalıb.

2020-ci ilin yanvar-mart aylarında Azərbaycanda ÜDM $10 milyard 777 milyon təşkil edib. Beləliklə, cari əməliyyatlar hesabının profisiti ÜDM-nin 6%-nə bərabər olub.

Mərkəzi Bankın saytında dərc olunmuş tədiyə balansına əsasən, cari ilin I rübündə neft-qaz sektoru üzrə profisit $2,4 milyard (azalma 19,2%), qeyri-neft sektoru üzrə kəsir $1,8 milyard (artım 28,4%) təşkil edib.

2020-ci ilin yanvar-mart aylarında bir barel neftin orta qiyməti $57,6 (2019-cu ilin müvafiq dövründə $61,9) təşkil edib.

Hesabat dövründə xarici ticarət dövriyyəsinin həcmi $7,1 milyard təşkil edib və Azərbaycan xarici ticarətdə $1,9 milyard (azalma 24,7%) məbləğində profisitə malik olub. Xarici ticarət dövriyyəsinin 13%-i MDB, 87%-i uzaq xarici ölkələrin payına düşüb.

$4,5 milyard həcmində ixracın (azalma 6%) strukturunda neft-qaz ixracı $4,1 milyard (azalma 6,9%), bilavasitə neft və neft məhsullarının ixrac həcmi $3,3 milyard, o cümlədən neft ixracı $3,2 milyard təşkil edib.

$2,6 milyard həcmində idxalın (artım 14,6%) strukturunda $1,1 milyard istehlak mallarının, o cümlədən $352 milyon ərzaq mallarının payına düşüb. Yanvar-mart aylarında ölkəyə $184,4 milyon dəyərində (bütün idxalın 7,1%-i) avadanlıq və xüsusi mallar idxal edilib.

2019-cu ildə Azərbaycanın tədiyə balansının cari əməliyyatlar hesabının profisiti $4 milyard 364,9 milyon təşkil edib ki, bu da 2018-ci illə müqayisədə 27,9% azdır.*

A.Əzizov