İkili standartlar və selektiv yanaşma beynəlxalq münasibətlər sistemində mövcud olan risk və çağırışlardır. Bunu xarici işlər naziri Ceyhun Bayramov noyabrın 30-da ATƏT-in Nazirlər Şurasının 30-cu iclasında çıxışı zamanı deyib.

XİN-dən verilən məlumata görə, nazir bildirib ki, bu istiqamətdə, beynəlxalq hüquq normalarına, xüsusilə dövlətlərin suverenliyi, ərazi bütövlüyü və sərhədlərinin toxunulmazlığına hörmət müstəsna əhəmiyyət kəsb edir.

Bayramov ATƏT-in hələ keçmiş Ermənistan-Azərbaycan münaqişəsi dövründə öz mandatının effektiv icrasına nail ola bilmədiyini, habelə postmünaqişə dövründə də təşkilat çərçivəsində bir sıra iştirakçı dövlətlərin Ermənistana havadarlığının və ATƏT mexanizmlərinin hələ də “uyğun olduğu”na dair istinadların reallığı əks etdirmədiyini bildirib.

O, 19-20 sentyabr tarixlərində Qarabağ bölgəsində görülən antiterror tədbirləri nəticəsində ərazilərimizdə Ermənistan tərəfindən öhdəliklərinə və şifahi bəyanatlarına zidd şəkildə saxlanan qeyri-qanuni rejimin buraxıldığını və tərk-silah edildiyini diqqətə çatdırıb.

Ermənistanla sülh danışıqlarına toxunan XİN başçısı mövcud çətinliklərə və çağırışlara, Ermənistan tərəfindən prosesin yersiz ləngimələrə məruz qalmasına, həmçinin bir sıra dövlətlərin öz geosiyasi oyunlarını regiona proyeksiya etmək cəhdlərinə baxmayaraq, Azərbaycanın sülh gündəliyinin təşəbbüskarı kimi prosesin irəlilədilməsində qərarlı olduğunu diqqətə çatdırıb.

Nazir, həmçinin görüşün (sülh prosesi çərçivəsində - İF) Azərbaycan-Ermənistan sərhədində, yaxud qərəzsiz və ya neytral üçüncü bir ölkədə keçirilməsini təklif edib.*

R.Əhmədov