2024-cü ilin yanvar ayında Azərbaycan əhalisinin sayı 2 min 891 nəfər və ya 0,03% artaraq 2024-cü il fevralın 1-nə 10 milyon 183,661 min nəfər təşkil edib. Bu barədə “İnterfaks-Azərbaycan” agentliyinə Dövlət Statistika Komitəsindən məlumat verilib.

Əhalinin 54,5%-i şəhər, 45,4%-i isə kənd sakinləridir. Əhalinin 49,8%-ni kişilər, 50,2%-ni qadınlar təşkil edir.

2024-cü ilin yanvar ayında ölkə üzrə 8 min 389 doğulan körpə (azalma 15,6%) qeydə alınıb. Əhalinin hər 1000 nəfərinə bu göstərici 9,7 (2023-cü ilin yanvar ayında – 11,5) təşkil edib. Körpələrin 278-i əkiz, 12-si üçəm olub.

Bu dövrdə 5 min 518 ölüm halı qeydə alınıb və əhalinin hər 1000 nəfərinə ölənlərin sayı 6,4 (2023-cü ilin yanvar ayında 6,8 - İF) təşkil edib.

2024-cü ilin yanvar ayında ölkədə qeydiyyat şöbələri tərəfindən 3,657 min nikah (2023-cü ilin yanvar ayı ilə müqayisədə azalma 8,1%) və 1,729 min boşanma halı (artım 26,2%) qeydə alınıb. **

X.Nəsirzadə