SOCAR-ın (Azərbaycan Dövlət Neft Şirkəti, ARDNŞ) “Azəriqaz” İstehsalat Birliyi Masallı rayonunda 2 kəndi qazlaşdırıb. Bu barədə “İnterfaks-Azərbaycan” agentliyinin regional bürosu məlumat verir.

25 ildən sonra Masallı rayonunun Ətcələr və Birinci Səmədxanlı kəndlərinə yenidən təbii qaz verilib.

157 abonenti olan Ətcələr kəndinin qazlaşdırılması üçün 9,695 min metr uzunluğunda metal borularla daşıyıcı və məhəllədaxili qaz xətləri çəkilib, 157 sayğac və fərdi tənzimləyicilər quraşdırılıb.

Birinci Səmədxanlı kəndində 194 abonentin qazlaşdırılması məqsədilə 194 ədəd sayğac və fərdi tənzimləyici quraşdırılıb, 20,674 min metrlik metal borularla daşıyıcı və məhəllədaxili qaz xətləri çəkilib.

İndiyədək Masallı şəhəri də daxil olmaqla, 70 yaşayış məntəqəsi qazlaşdırılıb, daha 4 kənddə qaz təchizatının bərpa olunması üzrə işlər aparılır. Hələlik 22 kənddə təbii qaz yoxdur.

G.Qənbərova