2021-ci ilin yanvar-sentyabr aylarında İpoteka və Kredit Zəmanət Fondunun (İKZF) agent bankları tərəfindən 282,3 milyon manat məbləğində ipoteka krediti verilib ki, bu da 2020-ci ilin müvafiq dövrünün göstəricisindən 56,4% çoxdur. Bu barədə “İnterfaks-Azərbaycan” agentliyinə Mərkəzi Bankdan (AMB) məlumat verilib.

Sentyabr ayında fondun agent bankları tərəfindən 26,2 milyon manat məbləğində ipoteka krediti verilib.

AMB-nin məlumatına görə, 9 ay ərzində İKZF 281,6 milyon manat məbləğində krediti təkrar maliyyələşdirib (2020-ci ilin yanvar-sentyabr ayları ilə müqayisədə artım 3,5 dəfə - İF).

Sentyabr ayında fond sosial ipotekanın maliyyələşdirilməsi üçün dövlət büdcəsindən vəsait almayıb. Yanvar-sentyabr aylarında İKZF dövlət büdcəsindən 35,5 milyon manat vəsait alıb.

Yanvar-sentyabr aylarında fond istiqrazların yerləşdirilməsindən 160 milyon manat (avqustda 55 milyon manat) cəlb edib.

2020-ci ildə İKZF-nin agent bankları tərəfindən 257,5 milyon manat məbləğində ipoteka krediti verilib (sentyabrda yerləşdirilmə həyata keçirilməyib).

Prezident İlham Əliyev 2017-ci il dekabrın 26-da “Azərbaycan İpoteka Fondu” ASC-nin ləğv edilməsi və İpoteka və Kredit Zəmanət Fondunun yaradılması haqqında fərman imzalayıb.

Kommersiya şərtləri ilə ipoteka kreditləri manatla və yalnız Azərbaycan vətəndaşlarına verilir. Kreditlər 3 ildən 25 ilədək müddətə verilir. Kreditin maksimum həcmi 150 min manatı keçməməlidir. Kredit illik 8%-dən çox olmayan dərəcə ilə verilir. İlkin ödəniş 15-25% təşkil edir.

Dövlət büdcəsindən yalnız sosial ipoteka maliyyələşdirilir. Onun maksimum məbləği 100 min manat təşkil edir, illik faiz dərəcəsi 4%-dən çox deyil. Müddəti 30 ilə qədərdir. İlkin ödəniş 10% təşkil edir.**

X.Nəsirzadə