Azərbaycan Xarici İşlər Nazirliyi cümə günü ölkəmizin İrandakı dörd diplomatının “arzuolunmaz şəxs” elan edildiyini təsdiqləyib.

Azərbaycan XİN-in spikeri Ayxan Hacızadə xatırladıb ki, aprelin əvvəlində İranın Azərbaycandakı səfirliyinin 4 əməkdaşı diplomatik statusa uyğun olmayan və Diplomatik Əlaqələr haqqında 1961-ci il Vyana Konvensiyası ilə ziddiyyət təşkil edən fəaliyyətlərə görə Azərbaycan hökuməti tərəfindən “persona-non-grata” (arzuolunmaz şəxs) elan edilib.

“İran tərəfi, öz növbəsində Azərbaycanın bu addımından bir neçə gün sonra, heç bir əsas olmadan və yalnız qarşılılıq prinsipini bəhanə gətirərək, ölkəmizin İrandakı səfirliyindən hələ yanvarda təxliyə olunmuş iki nəfər əməkdaşı və Baş konsulluğun iki nəfər əməkdaşını arzuolunmaz şəxs elan edib”, - Hacızadənin şərhində deyilir.

“Ölkəmizə qarşı (İran tərəfindən - İF) atılmış bu addım bir sıra problemlərin mövcud olduğu ikitərəfli münasibətlərə xələl gətirir”, - XİN-in spikeri əlavə edib. **

R.Kərimov