Azərbaycan Gürcüstanın strateji partnyorudur. Gürcüstanın baş naziri Bidzina İvanaşvili çərşənbə axşamı mətbuat konfransında belə bəyan edib.

“Mənim Azərbaycana bu yaxınlardakı səfərimi bir daha xatırlatmaq istəyirəm.Bu dostluq səfəri idi və mən bəyan etdim və bir daha da söyləyirəm ki, Azərbaycan bizim strateji tərəfdaşımızdır.Biz maksimal dərəcədə tərəfdaşlıq və dostluq münasibətləri yaratmağa cəhd edirik”,- deyə baş nazir qedy edib.

Gürcüstanda kompakt şəkildə yaşayan etnik azərbaycanlılar mövzusuna toxunan baş nazir söyləyib ki, Gürcüstan hökuməti bu insanların ölkənin ictimai və siyasi həyatına maksimal dərəcədə inteqrasiya olunmasına kömək göstərməlidir.

“Biz onların inteqrasiya olması, özlərini evlərində, öz ölkələrində hiss etmələri üçün əlimizdən gələni edirik”,- deyən baş nazir əlavə edib ki, azərbaycanlılar Gürcüstan vətəndaşı olaraq yalnız kənd və rayon inzibati dairələrinin başçıları səviyyəsində deyil, həm də nazirlik və digər yüksək postlarda da təmsil olunmalıdırlar.