2022-ci ilin yanvar-iyun aylarında Azərbaycanda baş vermiş 817 yol-nəqliyyat hadisəsi nəticəsində 336 nəfər həlak olub. Bu barədə “İnterfaks-Azərbaycan” agentliyi Dövlət Statistika Komitəsinə istinadən xəbər verir.

2022-ci ilin yanvar-iyun aylarında ölkədə 2021-ci ilin müvafiq dövrü ilə müqayisədə 8,1% çox yol-nəqliyyat hadisəsi baş verib, bu hadisələr nəticəsində həlak olan və yaralanan şəxslərin sayı 12,2% artaraq 1109 nəfər olub, 336 nəfər həlak olub, 773 nəfər yaralanıb.

Yol-nəqliyyat hadisələri nəticəsində həlak olanların 79,2%-ni, yaralananların isə 71%-ni kişilər təşkil edib.

Sərxoş vəziyyətdə olan şəxslərin iştirakı ilə 4 yol-nəqliyyat hadisəsi baş verib, nəticədə 1 nəfər həlak olub, 6 nəfər yaralanıb.

“Bütün yol-nəqliyyat hadisələrinin 40,8%-i nəqliyyat vasitələrinin və piyadaların, 37,6%-i bir neçə nəqliyyat vasitəsinin, 21,6%-i bir nəqliyyat vasitəsinin iştirakı ilə baş verib”, - deyə məlumatda bildirilir.

Hadisələrin 48,8%-i gündüz, 37,1%-i gecə, 14,1%-i isə toran vaxtı baş verib, 29,6%-i həftənin şənbə və bazar günlərinə təsadüf edib.*

E.Şəfiyev