2022-ci ilin yanvar-noyabr aylarında Azərbaycanda bütün növ nəqliyyat vasitələri ilə 197 milyon 298 min ton yük daşınıb ki, bu da 2021-ci ilin müvafiq dövrünün göstəricisindən 12,9% çoxdur. Bu barədə “İnterfaks-Azərbaycan” agentliyinə Dövlət Statistika Komitəsindən məlumat verilib.

Yük daşımalarının strukturunda 78,1% qeyri-dövlət nəqliyyat müəssisələrinin, 21,9% dövlət sektorunun payına düşüb. Bununla yanaşı, yanvar-noyabr aylarında qeyri-dövlət nəqliyyat müəssisələri tərəfindən yük daşımalarının həcmi ötən ilin müvafiq dövrü ilə müqayisədə 12,5% artıb.

Hesabat dövründə dəmir yolu ilə 17 milyon 47,6 min ton (tranzit yüklər daxil olmaqla) yük daşınıb ki, bu da ötən ilin müvafiq dövrünün göstəricisindən 25,8% çoxdur.

Dəniz nəqliyyatı ilə 6 milyon 965,9 min ton (artım 42,4%), avtomobil nəqliyyatı ilə 113 milyon 213,6 min ton (artım 12%), hava nəqliyyatı ilə 376 min ton (azalma 20,2%) müxtəlif yük daşınıb. Yanvar-noyabr aylarında daxili neft kəmərləri vasitəsilə 34 milyon 418,9 min ton neft (artım 7,4%) nəql olunub.

Nəqlin qalan həcmi magistral qaz kəmərlərinin payına düşüb.**

B.Rüstəmbəyov