Azərbaycanda fəaliyyət göstərən bankların xarici öhdəlikləri 2023-cü il noyabrın 30-na 2 milyard 227,1 milyon manat təşkil edir ki, bu da 2022-ci ilin sonuna olan göstəricidən 26,4% çoxdur. Bu barədə “İnterfaks-Azərbaycan” agentliyinə Azərbaycan Mərkəzi Bankından (AMB) məlumat verilib.

Noyabr ayında bankların xarici öhdəlikləri 4,4% və ya 101,7 milyon manat (oktyabrda -35,6 milyon manat) artıb.
AMB-nin məlumatına görə, noyabr ayının sonuna Azərbaycan banklarının xalis xarici aktivləri 2 milyard 825,9 milyon manat təşkil edir ki, bu da 2022-ci ilin sonuna olan göstəricidən 2,3 dəfə azdır.
Noyabrda bankların xalis xarici aktivləri 329,2 milyon manat və ya 10,4% azalıb (oktyabrda +275,8 milyon manat).
2022-ci ildə bankların xarici öhdəlikləri 65,7%, xalis xarici aktivləri – 10,7% artıb.
Azərbaycan banklarının xarici öhdəlikləri qeyri-rezidentlərdən cəlb edilən kredit və depozitlərdən, qeyri-rezidentlərdə yerləşdirilən qiymətli kağızlardan formalaşır.
2023-cü il oktyabrın sonuna Azərbaycanda 23 bank fəaliyyət üçün lisenziyaya malikdir.**

R.Əhmədov