Türkiyə prezidenti Rəcəb Tayyib Ərdoğan yaxın gələcəkdə Bakıya gələcək. Bunu prezident İlham Əliyev deyib.

“Yaxın gələcəkdə Bakıda Türkiyə-Azərbaycan Strateji Əməkdaşlıq Şurasının toplantısı keçiriləcək və prezident Rəcəb Tayyib Ərdoğan bizim qonağımız olacaq”, - deyə o, bu gün Bakıda Türkiyə Respublikasının xarici işlər naziri Mövlud Çavuşoğlunu qəbul edərkən bildirib.

İ.Əliyev əminliyini bildirib ki, bu il də Türkiyə-Azərbaycan əlaqələri uğurla inkişaf edəcək. “Keçən il çox böyük uğurlarımız olubdur və birlikdə TANAP-ın Avropa sərhədinə çatdırılmasını qeyd etdik. Bundan başqa, bir çox önəmli layihələr uğurla icra edilir”, - deyə dövlət başçısı qeyd edib.

O, bu yaxınlarda Çindən Azərbaycan vətəndaşlarını təxliyə etdiyinə görə Türkiyəyə minnətdarlığını bildirib. “Bu, Türkiyə-Azərbaycan qardaşlığının növbəti təzahürüdür. Azərbaycanda bu addım, bu hərəkət çox yüksək qiymətləndirilir”, - deyə İ.Əliyev əlavə edib.

Prezidentin sözlərinə görə, Azərbaycan və Türkiyə AŞPA-da bir-birinə dəstək göstərir. “Əfsuslar olsun ki, 20 il ərzində bu təşkilat Azərbaycanı hədəf seçib, Türkiyəni isə daha uzun müddət ərzində. O illərdən bəri Avropa Şurasında deqradasiya prosesi gedir. Bu təşkilat beynəlxalq müstəvidə öz əhəmiyyətini itirməkdədir. Təşkilat dünyada gedən proseslərə heç bir təsir etmək gücündə deyil. Təşkilatın nüfuzu çox aşağı düşüb və bunun yəqin ki, başlıca səbəbi təşkilatda hökm sürən riyakarlıq, ikili standartlar və ədalətsizlikdir. Çünki təxminən 20 il ərzində müxtəlif dövrlərdə siyasi sifarişi icra edərkən Azərbaycan hədəf seçilibdir, bizim haqqımızda olmayan yalanlar uydurulur, yayılır. Azərbaycan sanki geridə qalmış bir ölkə kimi təqdim edilir, Azərbaycanda gedən müsbət proseslər qeydə alınmır. Azərbaycanı ancaq qara rənglərlə boyamağa çalışırlar və yenə də əsassız, saxta məlumat əsasında məruzələr dərc olunur və qətnamələr qəbul edilir. Sanki Azərbaycanda siyasi məhbuslar var, sanki Azərbaycanda demokratik prosesə əngəl törədilir”, - deyə dövlət başçısı vurğulayıb.

İ.Əliyev qeyd edib ki, Avropa Şurası Ermənistanda gedən qeyri-demokratik proseslərə, o cümlədən eks-prezidentlərin, ölkə hakimiyyətini tənqid edən jurnalistlərin həbsinə susur. “Nə üçün? Nə üçün Ermənistana qarşı bir münasibət var, Azərbaycana, Türkiyəyə qarşı başqa münasibət? Biz bu sualın cavabını yaxşı bilirik və bir daha qeyd etmək istəyirəm, yaxşı olardı ki, Avropa Şurası bu məsələlərlə məşğul olsun.Avropa Şurası Avropanın aparıcı ölkələrində polis qəddarlığına, zorakılığa, insanların polis tərəfindən öldürülməsinə diqqət yetirsin, o ölkələri qınasın, o ölkələrin hüquq mühafizə orqanlarına irad tutsun. Biz bunu eşitmirik, biz televiziyada görürük”, - deyə prezident bildirib.

O əlavə edib ki, Türkiyə bu gün dünya miqyasında güc mərkəzidir və Azərbaycan buna çox sevinir. Heç bir kənar qüvvə nə Türkiyəyə, nə Azərbaycana təsir edə bilməz.

“Avropa Şurasında olsun, digər platformalarda olsun, əlbəttə, bir-birimizi dəstəkləyəcəyik. Siz dediyiniz kimi, ikili standart hər yerdə var. Təəssüf ki, ideologiyalara boyun əyən təşkilatlar var. Bunlardan biri də Avropa Şurasıdır. Yeni baş katibə, yeni sədrə, hamısına deyirik ki, mövqeyinizi itirirsiniz, bunları düzəltmək üçün biz töhfə verə bilərik. Amma hazırda təəssüf ki, vəziyyət budur”, - deyə M.Çavuşoğlu vurğulayıb.

O əlavə edib ki, Azərbaycan və Türkiyə ikili standartlarla mübarizəni birlikdə davam etdirəcək.*

A.Əzizov