2023-cü ilin yanvar ayında Azərbaycan əhalisinin sayı 4 min 228 nəfər və ya 0,04% artaraq 2023-cü il fevralın 1-nə 10 milyon 131,373 min nəfər təşkil edib. Bu barədə “İnterfaks-Azərbaycan” agentliyinə Dövlət Statistika Komitəsindən məlumat verilib.

Əhalinin 54,6%-i şəhər, 45,4%-i isə kənd sakinləridir. Əhalinin 49,8%-ni kişilər, 50,2%-ni qadınlar təşkil edir.

Yanvarda ölkə üzrə 9 min 935 doğulan körpə qeydə alınıb ki, bu da bir il əvvəllə müqayisədə 2,6% azdır və əhalinin hər 1000 nəfərinə bu göstərici 11,5 təşkil edib. Doğulan uşaqlar arasında oğlanların xüsusi çəkisi 53,5%, qızların xüsusi çəkisi isə 46,5% olub. Körpələrin 296-sı əkiz, 30-u üçəmdir.

Bu dövrdə 5 min 810 ölüm halı qeydə alınıb və əhalinin hər 1000 nəfərinə ölənlərin sayı 6,8 (2022-ci ilin yanvar ayında 7) təşkil edib.

Cari ilin yanvar ayında ölkədə qeydiyyat şöbələri tərəfindən 3,979 min nikah (2022-ci ilin yanvar ayı ilə müqayisədə azalma 27,3%) və 1,37 min boşanma halı (artım 9,8%) qeydə alınıb.*

X.Nəsirzadə