2020-ci ilin noyabr ayından etibarən – İkinci Qarabağ müharibəsi sona çatandan sonra Qarabağ və Şərqi Zəngəzurda 314 Azərbaycan vətəndaşı Ermənistan tərəfinin yerləşdirdiyi minaların qurbanı olub. Onlardan 61 nəfər həlak olub.

Çərşənbə axşamı XİN-dən “İnterfaks-Azərbaycan”a daxil olan bəyanatda qeyd olunur ki, bu gün səhər saatlarında 2 mülki şəxs daxil olmaqla, daha 6 nəfər mina qurbanı olub.

“Xocavənd rayonu ərazisində baş verən mina partlayışı bir daha göstərir ki, Üçtərəfli bəyanatın 4-cü bəndini kobudcasına pozaraq Azərbaycan ərazisindən erməni silahlı qüvvələrini hələ də çıxarmayan, hərbi fəaliyyəti və minaların yerləşdirməsini davam etdirən Ermənistanın və onun yaratdığı qondarma rejimin əsas məqsədi bölgədə hərbi gərginliyi artırmaq, terrorçuluqla məşğul olmaqdır”, - bəyanatda deyilir.

XİN vurğulayır ki, bu təxribatların məqsədi post-münaqişə dövründə aparılan genişmiqyaslı bərpa-quruculuq işlərinə, bu ərazilərdə fəaliyyət göstərən mülki əhaliyə, habelə məcburi köçkünlərin geri qayıtmasına və öz yerlərində dinc yaşamasına maneçilik yaratmaqdır.

XİN bölgədə sülh və təhlükəsizliyin təmin edilməsi üçün Ermənistanın və onun yaratdığı qondarma rejimin hərbi təxribatlarını və törətdiyi terror aktlarını qətiyyətlə pisləməyə və onların qarşısın alınmasına çağırıb. **

X.Nəsirzadə