2023-cü ilin yanvar ayında Azərbaycanın 20 iri dövlət və özəl şirkəti tərəfindən qeyri-neft məhsullarının ümumi ixrac həcmi $185,43 milyon təşkil edib. “İnterfaks-Azərbaycan” agentliyi xəbər verir ki, bu barədə İqtisadi İslahatların Təhlili və Kommunikasiya Mərkəzinin məlumatında deyilir.

2023-cü ilin yanvar ayında dövlət şirkətləri arasında “Azərenerji” ASC ($72,4 milyon), özəl şirkətlər arasında isə “MKT İstehsalat Kommersiya” MMC ($10,6 milyon) qeyri-neft məhsullarının ən iri ixracatçısı olub.

Qeyri-neft sektoru üzrə ixrac əməliyyatlarında iştirak edən dövlətə məxsus olan şirkətlərin siyahısında aşağıdakı şirkətlər də təmsil olunur: SOCAR-ın Marketinq və İqtisadi Əməliyyatlar İdarəsi ($29,6 milyon), “SOCAR Polymer” MMC ($23 milyon), “Azəralüminium” MMC ($10,4 milyon), “Azərpambıq Aqrar Sənaye Kompleksi” MMC ($2,2 milyon), “Azərbaycan Hava Yolları” QSC ($1,2 milyon), “Şəki Şərab” MMC ($138,6 min), “İqlim Elmi-İstehsalat Müəssisəsi” MMC ($110,2 min), “Azeri M-I Drilling Fluids” MMC ($69,4 min), “Səngəçal Elektrik Stansiyası” MMC ($12,1 min).

Qeyri-neft sektoru üzrə qeyri-dövlət ixracatçı şirkətlərin siyahısına isə “Azerbaijan International Mining Company” ($6,8 milyon), “P-Aqro” MMC ($5 milyon), “Azərbaycan Şəkər İstehsalat Birliyi” MMC ($4,8 milyon), fiziki şəxs Şirinov Elvin Valeh oğlu ($3,7 milyon), “Almeyvə” MMC ($3,6 milyon), “Rose Servis” MMC ($3,6 milyon), “Best Logistik” MMC ($2,9 milyon), “Baku Steel Company” MMC ($2,8 milyon) və “Mors Trading” MMC ($2,5 milyon) daxildir.

Azərbaycan 2023-cü ilin yanvar ayında $284,5 milyon məbləğində qeyri-neft məhsulları (2022-ci ilin müvafiq dövrü ilə müqayisədə artım 22,6%) ixrac edib.*

N.Abbasova