Rəsmi İrəvan sərhəddə erməni hərbçisinin həlak olması ilə bağlı yalan açıqlaması ilə silahlı qüvvələrində baş verən özbaşınalığı ört-basdır etmək niyyəti daşıyır. Azərbaycan Xarici İşlər Nazirliyində belə hesab edirlər.

XİN Ermənistan tərəfinin guya Azərbaycan tərəfinin açdığı atəş nəticəsində erməni hərbçisinin həlak olması ilə bağlı iddianın əks olunduğu dezinformasiya xarakterli, iftira dolu iddianı qətiyyətlə rədd edib.

“Ermənistan tərəfinin bu yalan açıqlaması silahlı qüvvələrində baş verən özbaşınalığı və hərc-mərcliyi ört-basdır etmək niyyəti daşıyır.(...) Ermənistan tərəfi indi də bu cür pozucu açıqlamaları ilə normallaşma prosesinin perspektivlərinə xələl gətirir”, - XİN-də Ermənistan XİN-in 4 dekabr 2023-cü il tarixli bəyanatını şərh edərkən qeyd olunub.

Nazirlikdə hesab edirlər ki, “Ermənistan tərəfi bu kimi açıqlamalar ilə həmçinin sərhəd bölgələrində süni gərginlik yaratmaq və üçüncü dövlətlərin diqqətini cəlb etmək məqsədi güdür”.
XİN-dən bir daha xatırladıblar ki, Azərbaycan öz tərəfindən postmünaqişə mərhələsində sülh və quruculuq səylərini davam etdirəcək və “bu prosesə qarşı yönələn hər hansı addımların qarşısını qətiyyətlə alacaq”. **

X.Nəsirzadə