2018-ci ilin birinci rübünün yekunları üzrə Azərbaycanda inflyasiya 4% təşkil edib. Bunu Azərbaycan prezidenti İlham Əliyev deyib.

“İnflyasiya birinci rübdə cəmi 4% olub. Bu barədə də mən ilin əvvəlində öz fikirlərimi bildirmişdim və qeyd etmişdim ki, əminəm, inflyasiya aşağı səviyyədə olacaq və əhalinin gəlirləri inflyasiyanı qabaqlayacaq. Belə də oldu. Əhalinin gəlirləri təxminən 10% artıb, inflyasiya isə cəmi 4%”, -

İ.Əliyev Nazirlər Kabinetinin 2018-ci ilin birinci rübünün sosial-iqtisadi inkişafının yekunlarına və qarşıda duran vəzifələrə həsr olunan iclasda bildirib.

Prezident həmçinin qeyd edib ki, ölkənin xarici ticarət dövriyyəsi 31%, ümumi ixrac 24%, qeyri-neft ixracı isə 37% artıb.

“Birinci rübdə sənaye istehsalı 2 faiz, qeyri-neft sənayesi isə təxminən 10% artıb. Bu da ölkəmizdə son illər ərzində aparılan sənayeləşmə siyasətinin nəticəsidir. Qeyri-neft sənayemiz 10% artıb və hesab edirəm ki, bu, rekord göstərici sayıla bilər”, - İ.Əliyev bəyan edib.

O cümlədən, dövlət başçısı vurğulayıb kii, kənd təsərrüfatı 4,2% artıb.

Onun sözlərinə görə, yamvar-mart aylarında 34 min yeni iş yeri yaradılıb ki, onlardan 31 mini daimi iş yeridir. “2004-cü ildən bu günə qədər Azərbaycanda təxminən 1 milyon 500 min yeni daimi iş yeri yaradılıb”, - İ.Əliyev bildirib.

Prezident qeyd edib ki, turistlərin sayı birinci rübdə 12,5% artıb. “Əgər biz əvvəlki illəri də nəzərə alsaq görərik ki, bu dinamikada ardıcıllıq vardır. Bunun da bir çox səbəbləri var - Azərbaycanda hökm sürən sabitlik, təhlükəsizlik, xalqımızın qonaqpərvərliyi, tarixi abidələrimiz, infrastruktur, 6 beynəlxalq aeroport, yollar, otellər”, - o vurğulayıb. **

B.Rüstəmbəyov