“GL” ASC çərşənbə günü 1 milyon 156 min manat məbləğində istiqraz yerləşdirib.

Bakı Fond Birjasından (BFB) “İnterfaks-Azərbaycan” agentliyinə bildirilib ki, hərraca 1,3 milyon manat məbləğində istiqraz çıxarılıb. Beləliklə, “GL” hərracda istiqrazlarının 88,9%-ni yerləşdirib.

“Hərrac zamanı 20 investor tərəfindən 20 sifariş təqdim edilib. Hərracın yekunları üzrə istiqrazların nominal qiymətlə yerləşdirilmiş həcmi 1 milyon 156 min manat təşkil edib”, -BFB-dən bildirilib.

İstiqrazlar üzrə illik gəlirlilik 13%, faiz ödəniş dövrü 30 gündən bir, tədavül müddəti isə 5 ildir.

Yerləşdirmə üzrə anderrayter “INVEST-AZ İnvestisiya Şirkəti” QSC-dir.

Xəbər verildiyi kimi, “GL” ASC 6 tranşla 3 milyon 25 min manat məbləğində istiqraz yerləşdirməyi planlaşdırır: 1-ci tranş - 700 min manat (müddət - 60 ay, illik gəlirlilik – 14%), 2-ci tranş - 1,3 milyon manat (müddət - 60 ay, gəlirlilik – 13%), 3-cü tranş – 425 min manat (müddət - 60 ay, gəlirlilik – 12%), 4-6-cı tranşlar – hər biri 200 min manat (müddət - 60 ay, gəlirlilik – 12%).

“GL” ASC oktyabrın 10-da 399 min manat məbləğində istiqraz yerləşdirib. Hərraca 425 min manat məbləğində istiqraz çıxarılmışdı.

“GL” ASC 2016-cı ilin iyun ayında dövlət qeydiyyatına alınıb. Şirkətin səhmdarı bir fiziki şəxsdir. “GL” daşınar әşyaların girov qoyulması müqabilindә kreditlәrin verilmәsini hәyata keçirir. 2022-ci ilin sonuna ASC-nin aktivləri 40,6 milyon manat, kredit portfeli 34,3 milyon manat, öhdəlikləri 38,3 milyon manat məbləğində qiymətləndirilir. 2022-ci ildə şirkətin xalis mənfəəti 3,8 milyon manat təşkil edib.**

R.Əhmədov