Prezident İlham Əliyev bəyan edib ki, sentyabr əməliyyatı Azərbaycan Ordusuna Azərbaycan-Ermənistan sərhədi istiqamətində daha əlverişli mövqelərə sahib olmağa və gələcəkdə böyük problemlərdən sığortalanmağa imkan verdi.

“Bu il bir çox önəmli hadisələr baş verib. Biz Azərbaycan-Ermənistan sərhədində məcburən hərbi əməliyyat keçirməli olduq”, - deyə dövlət başçısı bu gün Qərbi Azərbaycandan olan bir qrup ziyalı ilə görüşündə bildirib.

Onun sözlərinə görə, sentyabr toqquşmaları bizi gələcəkdə böyük problemlərdən sığortalayacaq. “Çünki Ermənistanda revanşist qüvvələr baş qaldırır, - istər iqtidarda, istər müxalifətdə, - faktiki olaraq bizim üçün fərqi yoxdur. Çünki Ermənistanda cəmiyyətin şüuru o qədər zəhərlənib, azərbaycanofobiya o qədər geniş vüsət alıb ki, orada faktiki olaraq normal düşüncəyə malik olan, - mən siyasi sahəni nəzərdə tuturam, - qalmayıb. Ona görə onlar revanş fikri ilə yaşayırlar. Onlar yenə də ümid edirlər ki, kimsə gələcək onların əvəzinə bizimlə müharibə aparacaq, onlar da hər zaman olduğu kimi, hansısa himayədarın arxasında gizlənərək yenə də bizə qarşı öz məkrli planlarını həyata keçirəcəklər”, - deyə prezident vurğulayıb.

İ.Əliyev əlavə edib ki, “özümüzü bundan sığortalamaq üçün biz mütləq Azərbaycan-Ermənistan sərhədi istiqamətində daha əlverişli mövqelərə sahib olmalı idik və buna nail olduq”.*

Xəbərlər şöbəsi