Prezident İlham Əliyev Ermənistanla sülh müqaviləsində Qarabağ haqqında hansısa müddəanın olmasının qəbuledilməz olduğunu bəyan edib.

“Görüş yaxşı keçdi, məncə, konstruktiv keçdi. Bir çox məsələlər, o cümlədən Ermənistanla Azərbaycan arasında sülh sazişinin imzalanması üçün lazım olan şərtlər müzakirə olundu”, - deyə dövlət başçısı jurnalistlərə fevralın 18-də Münxendə ABŞ-ın dövlət katibi Antoni Blinken və Ermənistan Respublikasının baş naziri Nikol Paşinyanla birgə görüşü şərh edərkən bildirib.

“Əlbəttə ki, mən öz mövqeyimi bir daha bildirdim. Əsas məsələ ondan ibarətdir ki, bu sülh müqaviləsi beynəlxalq norma və prinsiplər əsasında tərtib edilməlidir. Qarabağ haqqında hər hansı müddəanın olması qəbuledilməzdir. Bu haqda da Azərbaycanın mövqeyi bildirildi. Biz üç gün bundan qabaq Ermənistandan bizim təkliflərimizə yeni cavab təklifləri aldıq. İndi onları incələyirik”, - deyə İ.Əliyev vurğulayıb.

O qeyd edib ki, ilk baxışda Ermənistanın mövqeyində tərəqqi var, ancaq kifayət qədər deyil: “Yəni, əsas bu məsələ müzakirə olundu”.*

V.Əliyev