Ermənistan Azərbaycan və Türkiyə ilə kommunikasiyaların bərpası istiqamətində səmərəli addımlara hazırdır. Bu barədə Ermənistanın baş naziri Nikol Paşinyan bəyan edib.

"Biz regional kommunikasiyaların açılmasında konkret və təsirli addımlar atmağa hazır olduğumuzu təsdiqləyirik. Ermənistan hökumətinin təşəbbüsü ilə "Sülh qovşağı" layihəsi çərçivəsində biz Ermənistan ilə Azərbaycan arasında dəmir yolu əlaqəsini bərpa etməyə hazırıq", - Paşinyan cümə axşamı İrəvanda dənizə çıxışı olmayan inkişaf etməkdə olan ölkələrin nazirlər görüşündə bildirib.

Onun sözlərinə görə, şimaldakı dəmir yolları Azərbaycanın Qaxaz rayonunu Ermənistanın Tavuş rayonu ilə, cənubda Azərbaycanın qərb rayonlarını Naxçıvanla birləşdirəcək.

"Üstəlik, Azərbaycanın Naxçıvan ilə qərb rayonları həmçinin şimal yolu ilə birləşə bilər. Eyni şey Ermənistan ilə Azərbaycan arasında şimal, orta və cənub yollarına malik ola biləcək avtomobil yollarına da aiddir", - Paşinyan qeyd edib.

O, həmçinin Irəvanın Ermənistan ilə Türkiyə arasında dəmir yolu əlaqəsini bərpa etməyə və əvvəllər fəaliyyət göstərən iki avtomobil yolunu bərpa etməyə hazır olduğunu bildirib.

"Bütün bunlar regional və beynəlxalq iqtisadi, mədəni, siyasi əlaqələr, qlobal təhlükəsizlik üçün önəm kəsb edəcək. Bütün kommunikasiyalar, hava yolları, boru kəmərləri, kabellər, elektrik xətləri onların keçəcəyi ölkələrin suverenliyi altında fəaliyyət göstərməlidir", - Paşinyan deyib.

O qeyd edib ki, hər bir ölkə öz dövlət institutları vasitəsilə öz ərazisində sərhəd, gömrük nəzarəti, bütün infrastrukturların, daşınan yüklərin və sərnişinlərin təhlükəsizliyini təmin etməlidir.

«Bu məqsədlə Ermənistan hökumətinin qərarı ilə ölkənin Milli Təhlükəsizlik Xidmətində xüsusi bölmə yaradılıb», - Paşinyan bildirib. **